पिपही के बाजन सोहाओन, बड्ड मन भाबन लागइ रे,
ललना रे ढोलिआ बजाय दिअ, बबुआ के केश कटावन लागइ रे ।- 2

होरिला के मुड़ना मे नटुआ बजनिया, बजावन लागइ रे ।
ललना रे सुदूर सँ आयल गबैया, बधइया सुनावन लागइ रे । - 2

बाजे ढोल मृदङ्ग ताशा,झाल संग करताल यौ ।
सुनू सरगम धिआपुता, आइ लाले लाल यौ ।
बाजे ढोल मृदङ्ग ताशा,झाल संग करताल यौ ।
सुनू सरगम धिआपुता, आइ लाले लाल यौ ।
दादी भेलनि केश परछी की दादा धन लुटावन लागइ रे ।
ललना रे मौसी लेल हजमा बेकल भेल,नानी जी चुमाओन लागइ रे । - 2

केश कटलइ लागल उबटन, घैल सँ स्नान यौ ।
नवल कपड़ा बटुक पहिरल,आशीषक ओरिआन यौ ।
केश कटलइ लागल उबटन, घैल सँ स्नान यौ ।
नवल कपड़ा बटुक पहिरल,आशीषक ओरिआन यौ
भरि गाम नोत हकार से सुन्दर, बिधान लागइ रे ।
ललना रे मनइ मन मुदित विभोर, कि सोहर गावन लागइ रे । - 2