छोटी-मोटी टुटली मड़ैआ मे गौरी दाइ
छोटी-मोटी टुटली मड़ैआ मे गौरी दाइ, कोना कऽ रहथिन हे -2

गौरी हमर छथि बड़ सहलौला, कोना कऽ पिसथी भाङक गोला -2
हाथो मे...
हाथो मे पड़ि जैतनि लोड़ही के ठेला, रानी कोना कऽ पिसती हे -2
छोटी-मोटी टुटली मड़ैआ मे गौरी दाइ, कोना कऽ रहथिन हे।

भोला के दू धुर आकक बाड़ी, पित्तो नहि कएलनि खेती-पथारी -2
धियापुता...
धियापुता के पेट भऽ गेल बखारी रानी, कोना के भरथिन हे -2
छोटी-मोटी टुटली मड़ैआ मे गौरी दाइ, कोना कऽ रहथिन हे।

अपने महादेव भेला मसानी, के देत बसहा के गूड़ा ओ सानी -2
पड़ि गेल...
पड़ि गेल गौरी के भारी बिपति रानी, कते दुःख कटथिन हे -2
छोटी-मोटी टुटली मड़ैआ मे गौरी दाइ, कोना कऽ रहथिन हे।

भनहि विद्यापति सुनू हे मनाइन -2
त्रिभुवनपति भण्डारी के सङ्ग रानी, हँसी-खुशी रहथिन हे -2
छोटी-मोटी टुटली मड़ैआ मे गौरी दाइ,
कोना कऽ रहथिन हे -3